اغلاق

تاتا ... بقلم: نادين حاج يحيى

حبيبتي، عمري وحياتي كلها وكلشي بالنسبة لالي...!، اااااااااخ يا تاتا شو اشتقتلك، شو اشتقت لضحكتك، شو اشتقت لما تقعدي تستنيني لحتى انقلك الطبخة، اااااخ شو اشتقتلك !

 
الصورة للتوضيح فقط

والله يا تاتا الدار من غيرك بتسواش اشي ،الدار من غيرك مالهاش طعم !!
شو بتمنى ترجعي بس دقيقة لحتى اقلِك شو بحبك كثير وشو اشتقتلك , ترجعي واقُلك انك غالية عقلبي كثير كثير ...
شو بندم عكل دقيقة مقعدتش عندك ومكنتش جنبك
تاتا فش حدا مزعلش عليكي الصغار قبل الكبار ،
 الزلام قبل النسوان فش حدا بعرفك الا زعل عليكي
تاتا يا كل الغلا والحنية ، لو افُر العالم كله ما بلاقي  بطيبة قلبك يا ست الكل
شو تعبتي وضحيتي كثير مشانا لحتى تجمعينا وما تخلينا نفترق ...
رغم التعب الي تعبتي الا انك كنتي تحبي الطبخ رغم كل الاوجاع الا انه ما كان يجيلك قلب ما تطبخي ، شو اشتقت لطبخاتك ...
شو اشتقت لضحكتك  يا روح الروح

قلبك الطيب يا ستي بستاهلش يعيش بهاي الحياة
بستاهل اشي احسن واعظم
تاتا انتِ صرتي تقولي لصاحبتي انك بتحبي اي حدا بحبني، وانا بدي اقُلك انه حبي لالك بنوصفش بموت عليكي يا ستي يا حنونة !!
تاتا بتذكر قبل عيد ميلادي باسبوعين صرتي تقُليلي انه بدك تعطيني احلى عيدية عشان عيد ميلادي بس انا  بدي اياكي ترجعي وتعرفي انه سلامتك وصحتك كانت بالنسبة لالي احلى هدية ...
ويا ريت ترجعي
كيف يا تاتا بدي اروِح من المدرسة ومشُفكش قاعدة عند الطبيخ ووجهك الاحمر من الحم، ولما اقُلك السلام تاتا وانتي تبتسمي بوجهي ااااخ يا ستي ااااخ !
هسا عرفت انه ابتسامتك هاي بتسوا الدنيا وما فيها يا حياتي
كيف يا تاتا بدي اطل من البرندة وما القاكي قاعدة عالطاولة ...
كيف يا تاتا ننعيش من غيرك !! كيف؟!!!!
بتعرفي يا ستي شو راح تبقى امنيتي الوحيدة ودعائي الوحيد بليلة القدر هي انه يختفي مرض السرطان من العالم، لحتى محدا يخسر الناس الي بحبهم !
بحبك يا تاتا كلمة صغيرة وزي نقطة من بحر ،حبي لالك بنوصفش وما الو  حدود...
اااخ يا ستي شو تعبت عغيابك مش بس انا الكل تعب وزعل عغيابك الدموع الي نزلت من عينينا وراها يا ستي الف وجع وحسرة عغيابك
شو كنتي تقُليلي انتِ بنتي الي مخلفتهاش، بتعرفي يا ستي هاي احلى جملة اسمعتها وانتِ كمان يا ستي امي الثانية،
 امي الحنونة ،الطيبة، الي بعرفش قلبها يزعل عحدا،
 الي بتوخذش عخاطرها من حدا امي الي فش زيها ثنتين!!
ستي نتي كنتي لالي ام قبل ما تكوني ست كنتي لالي صاحبة واخت وكلشي حلو...
 بتعرفي يا ستي انه انتِ سعادتي... اااخ شو بحبك !!
والله الحياة من غيرك ما بتسوا اشي يا حبيبة عمري انتِ
شو كنت اخاف بيوم من الايام اصحا وما تكوني انتِ ومرة وحدة اجا هاليوم  كيف رح يكون النا نفس نيجي عالدار كيف راح يكون النا نفس ننبسط ونضحك من غيرك
بتعرفي ستي بس رُحتي راحت ضحكتنا معاكي راح حبنا نعيش بهالحياة راح  املنا حتى انه انحرمنا من اكلاتك الي فش زيهن !.

يا ريت الدموع والزعل خلوكي تشفي من المرض وترجعيلنا لكان زماااان رجعتي
لانه فش بني ادم ان كان بعرفك او بعرفكش زعل عليكي ، محدا بتذكرك الا بالخير قلبك الحنون الي وسع كل الناس  خلانا نتوجع عغيابو كثييير...
 شو كنتي تحبي الناس ، شو كنتي تفرحي لفرحنا، وتزعلي عزعلنا !! شو كان قلبك ميهونلوش انه ينجرح اصباع واحد فينا
اخ يا ستي شو اشتقت لما كنتي  تدعيلي احلى ادعية شو كانت تطمني هاي الادعية !!
منين يا ستي ننجيب زي حنيتك؟! هو في زيك انتِ!!
كيف بدو يمرق رمضان وانتِ مش معنا !!
كيف يا ستي بدو يمرق العيد وانتِ مش حدنا !كيف !!
لسا قبل فترة كنتي عنا وتحكي معنا وتضحكي وهسا انت مش هون !!وين رحتي يا ستي وين؟!!
تاتا بكل بساطة انتِ حياتنا وعمرنا انتِ القلب الطيب والحنون ،انتِ الغالية عقلوبنا، انتِ روحنا كلنا، انتِ ملكة النسوان كلهن يا عيوني انتِ
الله يرحمك ويجعل مثواكِ الجنة  يا اغلى من روحي يا ستي والحمد لله عكل اشي

لنشر خواطركم، قصائدكم، وكل ما يخطه قلمكم أو ما تودون أن تشركونا به، أرسلوها إلى البريد الالكتروني panet@panet.co.il

لمزيد من مقهى بانيت اضغط هنا

لمزيد من مقهى بانيت اضغط هنا
هذه الاعلانات قد تهمك
اغلاق