اغلاق

لحظات لا تنسى .. بقلم : بنان فرحات

بكرا رح تكبري وتتجوزي ويكون عندك مسؤوليات كبيرة.. رح تتركي عش طفولتك ، ذكرياتك ، العابك ، ضحكاتك ... سهراتك،


الصورة للتوضيح فقط         

غرفتك ، اخوتك .. بتنتقلي من حياة لحياة.. كنتي متعودة تدللي وتنامي ويكون اكلك جاهز ، بتتغير حياتك بكل المقاسات ومن كل الاتجاهات بتشتاقي لكل لحظة عشتيها بتتذكري اخوكي لما كان ينادي عليكي ويقولك تعالي بسرعة اقولك شي وانت تروحي متحمسة لتعرفي شو رح يقولك وبس توصلي يقولك اطفي الضي وروحي.. رح تشتاقي للمة الحلوة ولسهرات رمضان وقتالك مع اخوتك.. رح تشتاقي لحضن امك الدافي اللي كنتي ترتاحي فيو وينسيكي همومك ومشاكلك.. لابوكي السند اللي الك وقوتك بالحياة.. اخوكي اللي كان عامل فيها دور الاخو لكبير وعلقتك معو سوداء ع الطلعة وع النزلة، ويا ويلك اذا مسمعتيش كلمتو.. اختك الي اغلب قتالك معها ع شغل البيت والاواعي يا ويلها اذا لبستلك شي من دون علمك او مع علمك كان تعمليلها قصة ما الها آخر وبالاخر انت يلي تلبسي من اواعيها.. عيشي هاللحظات بكل تفاصيلها وما تتركي ولا شي يروح منك لانو لو مهما كانت حياتك حلوة بعش الزوجية رح يكون عندك هاد النقص والفراغ الكبير اللي ما حدا رح يعبي مطرحو بقلبك غير اهلك.. انت رح تسرقي اخو من عيلتو ورح ينسرق اخوكي منك.. هاي لعبة القدر هون لا تقسي عليه بكلامك ولا تتركي هالنقطة تغيرلك حياتك كوني انت ولا تخلي غيرتك تكون محلك ما في شي رح يعوضك هاللحظات ..


لنشر خواطركم، قصائدكم، وكل ما يخطه قلمكم أو ما تودون أن تشركونا به، أرسلوها إلى البريد الالكتروني panet@panet.co.il



لمزيد من مقهى بانيت اضغط هنا

لمزيد من مقهى بانيت اضغط هنا
اغلاق