اغلاق

لمة رمضان الجميلة، بقلم: حسن دسوقي

شهر رمضان وأنا صغير يمكن اختلف عن دلوقتي، لكن في حاجات أول لما بسمع كلمة رمضان لازم تخطر على بالي على طول:


حسن دسوقي

1-  اغاني رمضان
يسلام على اغاني شهر رمضان كلها فرحة وسعادة ومن اجمل  الاغاني  “مرحب شهر الصوم” و”رمضان جانا” و”أهو جه يا ولاد” و”هاتوا الفوانيس” و”حالو يا
حالو” يا بركة رمضان خليكي"   شوفوا رمضان

2- مدفع الإفطار
كنت بسمع صوته على طول في الراديو، صوت يزعق ويقول مدفع الإفطار إضرب ويقوم ضارب بوووووم، ورغم إنه صوت مدفع لكن كان دايماً مصدر بهجة وسعادة وإحنا صغيرين، لإن معناها خلاص هناكل ونشرب.

3- زينة رمضان فى الشوارع
ومكنش ينفع رمضان من غير ما الشوارع تتزين من بيت لبيت، ونلم من بعض فلوس عشان نشتري الورق واللزق والحبال، وفي وسط الزينة لازم فانوس رمضان الكبير ينور الشارع من المغرب للفجر.

4- الشوادر
وفى كل منطقة لازم تلاقي شادر ولا اتنين، فيهم كل اللي ممكن تحتاجه من لوازم رمضان، مكسرات وخشاف، وفوانيس، كان جزء من المتعة إننا ندوق واحنا أطفال، ونتحايل عشان نشيل مع الكبار حاجات رمضان .

5- قبل الفطار
شهر رمضان يعني في كل شارع هتلاقي ناس بتوزع عصاير وميّه وتمر، أو مائدة إفطار جماعي (مائدة الرحمن).

6- المسحراتي
على طبلته كان كل يوم ينادي على سكان الشارع بالاسم، على أم أيمن، وام مريم  وياعمى  سعيد، وأبو عمر، الكل لازم يصحى عشان يلحق السحور، وزي ما قال الشاعر الكبير فؤاد حداد: "وأنا صنعتي مسحراتي في البلد جوال".
مظاهر كتيرة من مظاهر رمضان اختلفت، ومحدش عارف كمان كام سنة إيه اللي هيفضل موجود وإيه اللي هيختفي، لكن اللي لازم نحافظ عليه هو لمة العيلة.

(ابن مصر حسن دسوقي)



لمزيد من اخبار عالمية وسياسية اضغط هنا

لمزيد من مقهى بانيت اضغط هنا
هذه الاعلانات قد تهمك
اغلاق