اغلاق

ريم زعبي دحلة من طرعان: هل تعرفون ماذا يعني حرق قلب أم على ابنها؟

ريم زعبي دحلة تكتب لموقع بانيت عن ظاهرة القتل .. بكلماتها التي تريد ان تصل المجتمع بالكامل وبالعامية ، تقول ريم زعبي دحلة من طرعان في رسالتها


ريم زعبي دحلة

المكتوبة : "بدي احكي عن شغلة مضايقتني ومضايقتكو هي ظاهرة القتل يلي عم نشوفها في الاونة الاخيرة ،
ليش القتل ، ليش العنف ليش الحقد والحسد ، بخلوك من الكراهية تقتل روح انسان ، وتصير مجرم بكل معنى الكلمة !هاي الرووح إيلي قتلتها ، ضميرك ما بعذبك ، ولا مات ضميرك ، وماتت الروح ايلي جواتك وصرت من الكراهية والحقد تقتل ، اي حدا بضايقك ، اه تقتل رووح خلقها ربنا ، ليش ؟؟؟؟؟؟ تقتل رووح وتبعدو عن اولادو وعيلتو ليش ؟؟؟ لما واحد طالع عشان لقمة العيش ، بنقتل بدم بارد عادي ، عادي انك تقتل انسان طالع عشان يلم مصاري ويعيش عيلتو ! طالع بنص الليل وبرووح على الصبح عشان يعيش عيلتو وبتيجي انت يا مجرم وبتقتلو ، شو ذنبهن .
تقتل ابوهن وتحرمهن من كلمة بابا ! شو ذنبهن هاي الاطفال يفكرو سيدهن هو ابوهن ، بس لانو انحرمو من كلمة بابا ، شو ذنب الاطفال الابرياء بس عشان حقد، وتفضي سمك وتبسط حالك ، بزعل غيرك ، ليش الحقد يا ناس ليش لي يكون قلبك اسود لهدرجة وانك تقتل رووح !! " .

"  مين انت لتقرر انو خلصت حياتو "
واضافت ريم زعبي دحلة :" ليش هالشباب ما شافت ايشي بحياتها وتيجي انت وتنهيلو حياتو ، ليش مين انت لتقرر انو خلصت حياتو انت انسان زيك زيو بتعرفش وينتا ربنا بوخذ روحك ، ليش تنو توخذ رووح غيرك ، وتمشي ولا كأنو صار ايشي، مات ضميرك ، فش قلب ولا احساس ولا شفقه مش على الشخص ايلي بدك تقتلو بس على اهلو ع قلب امو ، بتعرف شو يعني تحرق قلب ام بضناها ! بتعرف قديش ربنا بدو يسكرها بوجهك من جميع النواحي لانك قاتل وظالم ،
تقتل رووح عشان تقتل سمك ايلي بداخلك ، كيف بتغدر تنام على المخدة ، وانت اسمك قاتل ، وبيجي يوم ربنا يظلمك كيف بتظلم وبتقتل غيرك يا عديم الضمير .. دعوة امو بتدمرك كل حياتك ، لانك قتلت ضناها !! .
وينتا جد لوينتا ؟؟؟ ليه لكبير بعبي راس لصغير عالحقد والكراهية  ...إكره واضرب واقتل وهاذ هيك وهذاك هيك ليي طيب بتزرع بابنك هيك حكي وبتخليه يعمل تصرفات غلط لي ما تربي ابنك ع التسامح وانو يحب الكل ؟؟لي اول كلمة منعلمها لولادنا انو اضرب بتلاقي ولد صغير بضرب وابوه حاط اجرعإجر وبضحك وبقول بعدو صغير مهو شو بتزرع بتحصد لي بعدو صغير !!!" .
واردفت ريم زعبي دحلة :" منربي ولادنا عالكراهية وهاذ ما بريدلك الخير اضربو وهاذ عدوك اقتلو طيب لوين بدنا نصل بالاخر نتعدى على ابسط حق للانسان يلي هو حق الحياة كمان هاذ نوخذو !!! علم ابنك ع الصح مش اضرب واقتل , علمو يكون بصفات حسنة لتكسب فيو حسنات علمو ع التقوى..... انا مش قايلة يسكت عن حقو لااا وابداا بس علموا اذا اخذ حقك اعرف كيف ترجعو مش هاذ اخذ حقي انا بدي اوخذ روحو .. الله يصلح الناس بس هيك بقول بالاخر ..
بغض النظر بس انجبرت اكتب هيك بلكي صحيت ضماير الناس من رسالتي ".

هذا المقال وكل المقالات التي تنشر في موقع بانيت هي على مسؤولية كاتبيها ولا تمثل بالضرورة راي التحرير في موقع بانيت .
نلفت انتباه كتبة المقالات الكرام ، انه ولاسباب مهنية مفهومة فان موقع بانيت لا يسمح لنفسه ان ينشر لكُتاب ، مقالات تظهر في وسائل اعلام محلية ، قبل او بعد النشر في بانيت . هذا على غرار المتبع في صحفنا المحلية . ويستثنى من ذلك أي اتفاق اخر مع الكاتب سلفا بموافقة التحرير.
يمكنكم ارسال مقالاتكم مع صورة شخصية لنشرها الى العنوان:
panet@panet.co.il .

لمزيد من الناصرة والمنطقة اضغط هنا
هذه الاعلانات قد تهمك
اغلاق